कोणी नाही भीमासारखा
ह्या संसारी दलितोद्धारी
महाउपकारी, झाला अमुचा सखा
कोणी नाही भीमासारखा...
पडीक भूमी जीवन अमुचे
कुणी कसेही तुडवित होते
मालक झाला त्याच भूमीचा
भूषविले ते मंगल नाते
तन मन कसूनी, बीज रुजवुनी
पिकवूनी गेला पिता...
कोणी नाही भीमासारखा
जातीयतेच्या अंधारातून
खंबीरतेने पुढे निघाला
करुनिया विद्येची साधना
विद्वत्तेचा पंडित झाला
थोर किती तो, घटनापती तो
तया तुम्ही ओळखा...
कोणी नाही भीमासारखा
बुद्धप्रणाली अंगीकारून
संघटली ती शक्ती मोठी
पंचशीलेने केले पावन
पिडलेले जन कोटी कोटी
हे विजयाचे, कार्य तयाचे
आता तरी पारखा...
कोणी नाही भीमासारखा
